دبئی سے تل ابیب جانے والی فلائی دبئی پر واقعہ، یو اے ای نے دہشت گردانہ کارروائی قرار دے دیا
ابوظبی: متحدہ عرب امارات نے دبئی سے تل ابیب جانے والی فلائی دبئی کی پرواز میں پیش آنے والے واقعے کو دہشت گردانہ کارروائی کی کوشش قرار دے دیا، جبکہ حکام کی جانب سے واقعے کے محرکات اور ممکنہ روابط کی تحقیقات جاری ہیں۔
متحدہ عرب امارات کے اٹارنی جنرل ڈاکٹر حامد سیف الشمسی کے مطابق تحقیقات سے ابتدائی طور پر معلوم ہوا ہے کہ معاون پائلٹ نے دورانِ پرواز کاک پٹ میں کپتان پر حملہ کیا اور طیارے کے کنٹرولز سنبھالنے کی کوشش کی۔
حکام کے مطابق معاون پائلٹ نے کاک پٹ میں موجود ایمرجنسی ایکس سے کپتان پر حملہ کیا، جس کے بعد طیارے کو ہنگامی صورتحال کا سامنا کرنا پڑا۔ عملے اور مسافروں کی مداخلت سے معاون پائلٹ کو قابو کیا گیا جبکہ طیارے کا کنٹرول دوسرے پائلٹس نے سنبھال لیا۔
واقعے کے دوران طیارے کو سعودی عرب کے تبوک ایئرپورٹ پر ہنگامی طور پر اتارا گیا، جہاں دونوں پائلٹس کو طبی امداد فراہم کی گئی۔
فلائی دبئی کی یہ پرواز 30 ستمبر کو دبئی سے تل ابیب جا رہی تھی۔ واقعے کے وقت طیارے میں 170 سے زائد افراد سوار تھے۔
متحدہ عرب امارات کے اٹارنی جنرل کے مطابق تحقیقات میں واقعے کے مکمل حالات، محرکات، ممکنہ روابط اور منصوبہ بندی سمیت دیگر پہلوؤں کا جائزہ لیا جا رہا ہے، جبکہ تکنیکی اور ڈیجیٹل شواہد کا بھی تجزیہ جاری ہے۔
حکام نے کہا ہے کہ حتمی نتائج تحقیقات مکمل ہونے کے بعد جاری کیے جائیں گے۔
