لاہور: پاکستان پیپلز پارٹی کی مرکزی صدر شعبہ خواتین فریال تالپور نے کہا ہے کہ عوام سے رابطہ رکھنا اور ان کی رائے معلوم کرنا پیپلز پارٹی کی روایت ہے، چاہے پارٹی اقتدار میں ہو یا اقتدار سے باہر۔
گورنر ہاؤس لاہور میں پیپلز پارٹی کے ورکرز کنونشن سے خطاب کرتے ہوئے فریال تالپور نے کہا کہ پارٹی کی ایک نمایاں خوبی یہ ہے کہ کارکنوں کو کھل کر بات کرنے اور اپنے خیالات کا اظہار کرنے کا موقع دیا جاتا ہے۔ انہوں نے بتایا کہ لاہور کے دورے کا بنیادی مقصد شہر میں پارٹی کی سیاسی پوزیشن کا جائزہ لینا تھا۔
فریال تالپور نے کہا کہ پیپلز پارٹی شہیدوں کی جماعت ہے اور عوام کی فلاح و بہبود کے لیے کام کرنے پر یقین رکھتی ہے۔ انہوں نے چھوٹی سیاسی جماعتوں کو غیر اہم قرار دیتے ہوئے کہا کہ پیپلز پارٹی عوام کے دلوں میں زندہ ہے۔ انہوں نے کارکنوں اور پارٹی کے وفادار ساتھیوں کو آئندہ بلدیاتی انتخابات کے لیے مکمل تیاری کی ہدایت بھی کی۔ ان کا کہنا تھا کہ لاہور سب کا شہر ہے اور پیپلز پارٹی اسے اپنا شہر سمجھتی ہے۔
کنونشن میں سابق وزیراعظم راجہ پرویز اشرف، نیر بخاری، ندیم افضل چن، قمر زمان کائرہ اور چیئرپرسن بینظیر انکم سپورٹ پروگرام روبینہ خالد سمیت بڑی تعداد میں پارٹی کارکنوں نے شرکت کی۔
اس موقع پر گورنر پنجاب سردار سلیم حیدر خان نے کہا کہ وہ پارٹی کارکنوں اور وفادار ساتھیوں کے ساتھ کسی قسم کی بدسلوکی برداشت نہیں کریں گے۔ انہوں نے کہا کہ پیپلز پارٹی بلدیاتی انتخابات میں بھرپور حصہ لے گی۔ ان کے مطابق پیپلز پارٹی عوام کی نمائندہ جماعت ہے جو ان کے مسائل کو سمجھتی اور انہیں حل کرنے کے لیے پرعزم ہے۔