دنیا بھر میں مائیکروسافٹ کی متعدد سروسز میں تکنیکی خرابی کے باعث صارفین کو شدید مشکلات کا سامنا کرنا پڑا، متاثرہ سروسز میں مائیکروسافٹ ٹیمز، آؤٹ لک اور مصنوعی ذہانت کا سافٹ ویئر کوپائلٹ بھی شامل ہیں۔
مائیکروسافٹ نے جمعرات کو سروسز میں تعطل کی تصدیق کرتے ہوئے کہا کہ کمپنی کنکشن کے مسائل دور کرنے کے لیے کام کر رہی ہے۔ کمپنی کے مطابق انفرااسٹرکچر کے ایک حصے پر غیر معمولی دباؤ بڑھنے سے صارفین کو مختلف سروسز تک رسائی میں مشکلات پیش آئیں۔
مائیکروسافٹ کا کہنا ہے کہ یہ مسئلہ صارفین کی جانب سے ٹریفک میں اضافے کے باعث پیدا نہیں ہوا بلکہ متعدد سرورز اچانک دستیاب نہ رہنے سے باقی سرورز پر دباؤ بڑھ گیا۔
آؤٹیج کی نگرانی کرنے والی ویب سائٹ ڈاؤن ڈیٹیکٹر کے مطابق برطانیہ اور امریکا میں بڑی تعداد میں صارفین نے مائیکروسافٹ کی سروسز متاثر ہونے کی شکایات درج کرائیں۔ امریکا میں صرف آؤٹ لک کے حوالے سے ایک لاکھ 31 ہزار سے زائد شکایات سامنے آئیں۔
کمپنی نے مزید بتایا کہ مسئلے کے حل کے لیے سرورز کی ترتیبات میں تبدیلی کا تجربہ کیا جا رہا ہے تاکہ سرورز کی خودکار جانچ کے دوران پیدا ہونے والی خرابی کو دور کیا جاسکے۔
