کراچی: معروف اداکارہ اور سوشل میڈیا اسٹار دنانیر مبین نے اداکاری کے بعد گلوکاری کے میدان میں بھی قدم رکھ دیا ہے، جہاں انہوں نے اپنا پہلا میوزک ٹریک ’ٹچ‘ ریلیز کرکے مداحوں کو اپنی نئی صلاحیت سے متعارف کرادیا۔
دنانیر مبین نے سوشل میڈیا پر ایک پروموشنل ویڈیو کے ذریعے اپنے پہلے گانے کی ریلیز کا اعلان کیا، جس کے بعد ان کے مداحوں میں بھی نئی پیشکش کے حوالے سے دلچسپی پیدا ہوگئی۔
اداکارہ کے مطابق گانے کی تیاری پر خاصی محنت کی گئی ہے اور انہیں امید ہے کہ سننے والے اس کی دھن اور انداز سے لطف اندوز ہوں گے۔ ٹریک میں ان کے ساتھ حیدر مستحسن نے بھی کام کیا ہے، جبکہ گانے میں جاندار ردھم اور توانائی نمایاں ہے۔
دنانیر مبین نے سوشل میڈیا سے شہرت حاصل کرنے کے بعد اداکاری کے شعبے میں بھی اپنی صلاحیتوں کا اظہار کیا اور مختلف ڈراموں و دیگر منصوبوں میں کام کیا۔ وہ ’صنفِ آہن‘ اور ’محبت گمشدہ میری‘ جیسے معروف پراجیکٹس کا حصہ رہ چکی ہیں۔
گلوکاری میں باقاعدہ قدم رکھنا دنانیر مبین کے فنی سفر کا ایک نیا مرحلہ ہے، جس کے ذریعے وہ اپنے مداحوں کے سامنے اپنی صلاحیت کا ایک نیا پہلو پیش کر رہی ہیں۔
