کوئٹہ سے تعلق رکھنے والی پاکستانی خاتون باکسر عابدہ بتول نے بین الاقوامی سطح پر تاریخ رقم کرتے ہوئے ویمنز انٹرنیشنل باکسنگ ایسوسی ایشن (WIBA) کا عالمی ایٹم ویٹ ٹائٹل اپنے نام کرلیا۔ انہوں نے تھائی لینڈ کے شہر پٹایا میں ہونے والے مقابلے میں میزبان ملک کی باکسر وانڈی سینونگ کھروٹ کو شکست دے کر یہ اعزاز حاصل کیا اور پاکستان کی پہلی خاتون باکسر بن گئیں جنہوں نے WIBA کا عالمی ٹائٹل جیتا۔
عابدہ بتول نے 31 اکتوبر 2026ء کو ایف سی سی اسٹیڈیم پٹایا میں منعقدہ ’بریو ہارٹس‘ باکسنگ ایونٹ کے دوران عالمی اعزاز کے لیے مقابلہ کیا۔ آٹھ راؤنڈز پر مشتمل فائٹ پانچویں راؤنڈ میں اس وقت روک دی گئی جب ایک غیر ارادی ہیڈ بٹ کے باعث عابدہ بتول کی ناک زخمی ہوگئی۔ رنگ سائیڈ ڈاکٹر کے فیصلے پر مقابلہ روک کر فیصلہ ججز کے اسکور کارڈ پر کیا گیا، جس میں دو ججز نے عابدہ بتول کے حق میں فیصلہ دیا اور یوں وہ عالمی چیمپئن بن گئیں۔
عابدہ بتول کی یہ کامیابی اس لیے بھی اہم ہے کہ وہ اس عالمی ٹائٹل کے لیے مقابلہ کرنے والی پہلی پاکستانی خاتون باکسر بھی ہیں۔ اس سے قبل وہ پاکستان کی صفِ اول کی خاتون پروفیشنل باکسر کی حیثیت سے پہچانی جاتی تھیں۔
ان کی کامیابی کا سفر آسان نہیں تھا۔ عابدہ بتول کو باکسنگ کے میدان میں قدم رکھنے کے لیے معاشرتی رویوں، مالی مشکلات اور اسپانسرشپ کی کمی سمیت مختلف چیلنجز کا سامنا کرنا پڑا۔ ابتدا میں گھر والوں کو بھی اس کھیل میں حصہ لینے کے لیے آمادہ کرنا ایک مشکل مرحلہ تھا، کیونکہ ہمارے معاشرے میں باکسنگ کو عمومی طور پر مردوں کا کھیل سمجھا جاتا ہے اور لڑکیوں کی اس شعبے میں شمولیت کو زیادہ پذیرائی نہیں ملتی۔
تاہم عابدہ بتول نے مشکلات کے باوجود اپنی تربیت اور مقابلوں پر توجہ برقرار رکھی۔ انہوں نے 2018ء میں باکسنگ کا آغاز کیا اور بعد ازاں مکسڈ مارشل آرٹس، ووشو اور کک باکسنگ میں بھی حصہ لیا۔ مختلف مقابلوں میں کامیابیوں کے بعد انہوں نے پاکستان کا قومی پروفیشنل باکسنگ ٹائٹل بھی جیتا۔
عابدہ بتول کے لیے تھائی لینڈ کا یہ دورہ اس سال دوسرا اہم عالمی ٹائٹل مقابلہ تھا۔ اس سے قبل جنوری 2026ء میں انہوں نے بنکاک میں ڈبلیو بی سی ایشیا ایٹم ویٹ ٹائٹل کے لیے مقابلہ کیا تھا، تاہم اس وقت انہیں کامیابی نہیں مل سکی تھی۔ بعد ازاں مسلسل محنت اور تیاری کے نتیجے میں انہوں نے عالمی اعزاز حاصل کرلیا۔
عابدہ بتول نے اپنی کامیابی پر اہل خانہ، کوچ، اسپانسرز اور پاکستانی قوم کا شکریہ ادا کرتے ہوئے کہا کہ وہ مستقبل میں بھی بین الاقوامی سطح پر پاکستان کی نمائندگی کرنا چاہتی ہیں۔ ان کا کہنا ہے کہ اگر انہیں حکومتی سرپرستی، مالی معاونت اور مناسب سہولتیں فراہم کی جائیں تو وہ مزید عالمی اعزازات حاصل کرکے ملک کا نام روشن کرسکتی ہیں۔
کوئٹہ کی اس باکسر کی کامیابی پاکستان میں خواتین کی پروفیشنل باکسنگ کے فروغ کے حوالے سے ایک اہم سنگ میل ہے۔ ان کی جدوجہد اور عالمی کامیابی بلوچستان سمیت ملک بھر کی ان نوجوان لڑکیوں کے لیے حوصلہ افزائی کا باعث ہے جو محدود وسائل اور معاشرتی رکاوٹوں کے باوجود کھیل کے میدان میں اپنی صلاحیتوں کا لوہا منوانا چاہتی ہیں۔
