پاکستانی ماڈل اور ٹی وی میزبان نادیہ حسین نے مقبول ڈرامہ سیریل ’درِ نجات‘ کے کردار زریاب پر تنقید کرتے ہوئے کہا ہے کہ اسے شوہر کے بجائے پیشہ ورانہ نفسیاتی علاج کی ضرورت ہے۔ ان کے مطابق زریاب بظاہر خوبصورت ہونے کے باوجود ایک ایسا کردار ہے جس کا رویہ رشتوں کے لیے خطرے کی علامت ہے۔
نادیہ حسین نے جمعرات کو انسٹاگرام پر جاری ویڈیو میں کہا کہ ڈرامے میں شیریار منور کا کردار ابو بکر زریاب کے رویے کو اس حد تک برداشت کر رہا ہے جو کسی عام انسان کے لیے ممکن نہیں۔ ان کا کہنا تھا کہ شادی کسی کے ٹوٹے ہوئے یا الجھے ہوئے معاملات کو درست کرنے کا ذریعہ نہیں بن سکتی۔
انہوں نے کہا کہ جس طرح کسی مسئلہ زدہ مرد کی شادی اس امید پر نہیں کرنی چاہیے کہ وہ بدل جائے گا، اسی طرح کسی اچھے انسان کو بھی ایسے شریکِ حیات کے ساتھ زندگی گزارنے پر مجبور نہیں کرنا چاہیے جو جذباتی طور پر غیر متوازن ہو۔ ان کے مطابق مرد بھی جذباتی بدسلوکی سے تحفظ اور باہمی احترام پر مبنی رشتے کے حق دار ہیں۔
ڈرامے میں زریاب کا کردار اداکارہ درفشاں سلیم نبھا رہی ہیں، جو اپنے اسکول کے زمانے کے محبوب زامل، جس کا کردار نمیر خان نے ادا کیا ہے، کے چھوڑ جانے کے بعد شدید جذباتی مشکلات کا شکار ہے۔ بعد ازاں اس کے والدین اس کی شادی اپنے خاندانی دوست ابو بکر سے کر دیتے ہیں، جو ایک نرم مزاج اور دیندار شخص ہے۔ تاہم زریاب اپنے ماضی کے دکھ کی وجہ سے شوہر کے ساتھ سخت رویہ اختیار کرتی ہے۔
نادیہ حسین نے زریاب کے اس رویے کو محض ازدواجی اختلافات کے بجائے جذباتی اذیت قرار دیا اور کہا کہ ابو بکر ایک ایسے رشتے کا حق دار ہے جہاں باہمی احترام اور صحت مند حدود کا خیال رکھا جائے۔
ڈرامے نے سوشل میڈیا پر ذہنی صحت، جذباتی صدمات اور طے شدہ شادیوں کے حوالے سے بحث چھیڑ رکھی ہے۔ بعض ناظرین زریاب کے دکھ سے ہمدردی رکھتے ہیں، جبکہ کئی افراد ابو بکر کے ساتھ اس کے رویے پر تنقید کر رہے ہیں۔ نادیہ حسین کے تبصرے نے بھی اس بحث کو مزید تقویت دی ہے۔
