بشکیک- چین، بھارت اور روس کے سربراہان یکم ستمبر کو بشکیک میں شنگھائی تعاون تنظیم (ایس سی او) کے اہم سربراہی اجلاس میں شرکت کریں گے، جہاں علاقائی تنازعات، سکیورٹی، اقتصادی تعاون اور خطے کی بدلتی صورتحال سمیت اہم معاملات پر تبادلہ خیال متوقع ہے۔
ایس سی او کے 25ویں سالگرہ کے موقع پر ہونے والے اجلاس میں تنظیم کے 10 رکن ممالک کے سربراہان شریک ہوں گے، جن کی مجموعی آبادی تقریباً 3.4 ارب بنتی ہے۔ پاکستان کے وزیراعظم شہباز شریف اور ایرانی صدر مسعود پزشکیان کی بھی اجلاس میں شرکت متوقع ہے۔
اجلاس کے دوران چینی صدر شی جن پنگ اور بھارتی وزیراعظم نریندر مودی کی ملاقات پر خصوصی توجہ مرکوز رہے گی۔ دونوں ممالک کے درمیان متنازع ہمالیائی سرحد پر کشیدگی کم کرنے کے لیے حالیہ سفارتی کوششوں کے بعد یہ ملاقات اہم قرار دی جا رہی ہے۔
پاکستان اور بھارت بھی ایک ہی پلیٹ فارم پر موجود ہوں گے، جبکہ جموں و کشمیر سمیت دونوں ممالک کے درمیان جاری اختلافات بھی علاقائی صورتحال کے تناظر میں اہمیت رکھتے ہیں۔
ایرانی صدر مسعود پزشکیان کی روسی صدر ولادیمیر پیوٹن سے الگ ملاقات بھی متوقع ہے۔ یہ دورہ ایسے وقت میں ہو رہا ہے جب ایران کو امریکا کی جانب سے بڑھتے ہوئے معاشی دباؤ کا سامنا ہے۔
ایس سی او اجلاس میں مشرق وسطیٰ، یوکرین اور افغانستان کی صورتحال بھی زیر بحث آنے کا امکان ہے۔ رکن ممالک کے درمیان انسداد دہشت گردی تعاون بھی اجلاس کے اہم موضوعات میں شامل ہوگا، جبکہ ایس سی او کے ریجنل اینٹی ٹیررسٹ اسٹرکچر سے متعلق اقدامات پر بھی غور کیا جائے گا۔
اقتصادی روابط اور علاقائی رابطہ کاری بھی اجلاس کے ایجنڈے کا حصہ ہوں گے۔ اس سلسلے میں ٹرانسپورٹ منصوبوں اور ایس سی او ڈویلپمنٹ بینک کے قیام سے متعلق امور پر بھی بات چیت متوقع ہے۔
شنگھائی تعاون تنظیم کا آغاز 1996 میں شنگھائی فائیو کے نام سے ہوا تھا، جس نے 2001 میں باقاعدہ تنظیم کی شکل اختیار کی۔ بھارت اور پاکستان 2017 میں مکمل رکن بنے جبکہ ایران نے 2023 میں رکنیت حاصل کی۔ بیلاروس 2024 میں تنظیم کا نیا رکن بنا، جس کے بعد رکن ممالک کی تعداد 10 ہوگئی۔
اجلاس کے اختتام پر ایس سی او کی 25ویں سالگرہ کے حوالے سے بشکیک اعلامیہ منظور کیے جانے کی توقع ہے۔ اس کے بعد کرغزستان تنظیم کی صدارت آئندہ ایک سال کے لیے پاکستان کے حوالے کرے گا۔
پاکستان 2027 میں ایس سی او کے سربراہان کے اجلاس کی میزبانی بھی کرے گا۔
