پاکستان میں دہشت گردی کے واقعات میں گزشتہ پانچ ہفتوں کے دوران نمایاں کمی ریکارڈ کی گئی ہے۔ پاکستان انسٹی ٹیوٹ فار کانفلکٹ اینڈ سکیورٹی اسٹڈیز (پی آئی سی ایس ایس) کی نئی رپورٹ کے مطابق 18 سے 24 ستمبر کے دوران ملک بھر میں دہشت گردی کے 61 حملے رپورٹ ہوئے، جبکہ 16 سے 22 اکتوبر کے دوران یہ تعداد کم ہو کر 21 رہ گئی، جو تقریباً 66 فیصد کمی کو ظاہر کرتی ہے۔
رپورٹ کے مطابق گزشتہ ہفتے کے مقابلے میں بھی عسکریت پسندوں کے حملوں میں 38 فیصد کمی دیکھی گئی۔ اس دوران جانی نقصان سے متعلق اعداد و شمار میں بھی بہتری سامنے آئی، اور 16 سے 22 اکتوبر کے دوران دہشت گرد حملوں میں زخمی ہونے والے افراد کی تعداد گزشتہ ہفتے کے 20 سے کم ہو کر 11 رہ گئی۔
پی آئی سی ایس ایس کی رپورٹ میں بتایا گیا ہے کہ سیکیورٹی فورسز نے ملک کے مختلف علاقوں میں 10 کارروائیوں کے دوران مجموعی طور پر 33 عسکریت پسندوں کو ہلاک کیا۔ رپورٹ میں فتنہ الہندوستان میں قیادت کے تنازع اور فتنہ الخوارج کی پراپیگنڈہ حکمت عملی میں تبدیلی کے سیکیورٹی صورتحال پر ممکنہ اثرات کا بھی جائزہ لیا گیا ہے۔
رپورٹ میں سامنے آنے والے اعداد و شمار کے تناظر میں سیکیورٹی اقدامات اور عسکریت پسندوں کی سرگرمیوں میں تبدیلی کو اہم عوامل کے طور پر دیکھا جا رہا ہے۔ تاہم، دہشت گردی کے مکمل خاتمے کے لیے مسلسل نگرانی، مؤثر حکمت عملی اور سیکیورٹی اداروں کے درمیان رابطہ کاری بدستور اہمیت رکھتے ہیں۔
